مشــكلتي مـع اهلي يوم شكــوا اني اكلم بنــت

برايفت للغالي.......!!

لعنبو ابليسك انا اعطيك رقمي واقولك شبكني مع بنات

اخر الليل تجيني رساله ومكتوب فيها (( اذا تبي تطلع معي ارسلي شحن سوا ))

وانا اللي انط وعلى طول بدون تردد ادق على الرقم ،،، وشوي ما اسمع

الا صووت من خشوونته تحس انك فارش فرشك داخل شكمان قلاب

وبعد اخذ وعطى ،، طلع هذا ...!! متطلم وعلى باله يقلد صوت بنت

المووهم

زبده موضوعي اليوم

انه اهلي قاعديلي ،،، متعلقين في رقبتي ،،، في كل صغيره وكبيره

يدخلون فيها طاري بنت ،،، اقولهم باطلع يقولون منهي اللي بتطلع معها

اقوولهم باكلم تلفون يقولون منهي هذي ؟!! ،،، اقولهم بارووح انام ،،،

يقولون نام والمبه مفتوحه عشان لا تحلم ببنت

<<< هذي حالته

وانا باعطيكم الحاقايق من اول وقولولي هل انا مظلوم او هم معم حق

~~~~ ايام المبزره ~~~~

لما كنت في الثانوي ،،، كنت شاب يافع ينشد به الظهر ،،، لدرجه انه كل

يوم ارجع للبيت وانا منضرب ،، وتطالعني امي بنظره اسى وحزن

وانا اقولها ،، ترى اعجبك ما بكيت ولا نزلت دمعه

كنت نحيل الجسم ،،، قصير القامه <<< قول قزم وفكنا

كنت اقوم قبل الدوام بساعه ،،، ارز وجهي عند المرايه والعب في الشنب

اللي مستانس انه طلعلي ،،، وكانت امي كل صبحيه تقولي

يادفين لعنبو ابليسك لو شنبك تكلم كان اشتكى ،،، اعتقه لوجه الله

وانا اللي ما اهتم واسالها ،،، يماااااه ،،، الشنب يكون متوارث ؟؟

ترد الوالده وعلى بالها انه هذا سؤال في الدمام واني مهتم

قالت ليه السؤال يا وليدي ؟!!

رديت وقلت ،،، لانه اخاف يطلعلي شنب مثل حق ابوي ،،، تقولين من

كثافته كانه غابه الامازون ماله حدود <<< يذب على ابووه

شوي ما القى الا طبعه في المرايه عباره عن طبعه خشمي الطويل

زائد(ن) براطمي << ابد امه ما صكت راسه بالمرايه

كان كل همي وانا في الحصه انه كيف اخوي الصغير يهزمني في

البلاي ستيشن ،،، وليه اللي جنبي يلعب في خشمه

واذا طلع منه شئ يقعد يطالع فيه على باله بيحتفظ بيه

مرت السنوات ،،، و الحل ما تغيرت ،،، الى ان جاء يوم وقالوا اهلي

دفينوه ،،، اخوالك ازعجونا يبونك تروح جده ،،، ها وش تقول ؟!!

وانا اللي تطلعلي سحابه فوق راسي واول شئ فكرت فيه

واااااو ،، جنقل لاند ،، ونااااسه <<< شفت البراءه كيف

وانا اللي اشيل عفشي والى جده

طبعا كان احسن مافيني انه من صغرتي وانا احب اكشخ ،،، فكنت

الاحظ على خالي هناك انه ياخذني معه في كل مكان ،،، مع العلم

انه اول كنت اذا قلتله باجي معك البقاله اللي جنبنا يقول انقلع لاتوطاك

وما اشوفه الا تقزز في الخليقه ،، بس لا لا لا مو الخليقه،،الا البنات بالذات

وكان اذا مر من جنب بنت يهز يدي وما يدري انه هزته كانه

واحد رافعني من راسي ويرجف فيني رجف ،،، المهم يهز يدي

ويقولي ابتسم ،،، وانا اللي افتح خشتي كذا ،،، ومن زود ماني فاتحها

وصله اللحمه اللي لها شهر متعلقه في ضرسي بانت

وكانت نهايه مبزرتي اني عرفت شئ جديد علي وهو

(( التعرف على البنات والبصبصه ))

~~~~ ايام الجامعه ~~~~

اللي اختلف فيها عن ايام المبزره ،،، اني صرت طوووويل <<< لاحظوا المده

وانه العنقز اللي كان في وجهي راح ،،، واني رحت درست في الخبر

كنت ما اعرف شئ اسمه راشد ،، كانوا اذا قالوا بنروح الراشد ،،، اطالع

فيهم بنظره استخفاف وفي نفسي اقول ،،، انا وش طيحني بين بزران

يبون يلعبون في الملاهي

وبعد مده عرفت الراشد ،،، وعرفت حل نص تساؤلاتي ايام المبزره

ومنها

ليه دائما الزباله في المجمعات مليانه من قصاصات الورق ؟؟

وعرفت ليه اذا انا شفت ورقه على كاونتر اخذها وارميها في الزباله

يجي صاحب الورقه ويتوطى في بطني

<<< قايلكم انسان برئ وحبيب

وبعد كم سنه ،،، وصلت لمرحله اني عرفت

(( كل شئ عن حركات الشباب مع البنات ))

~~~~ بعض الاحداث ~~~~

مع قناعتي انه مافي بنت بتملى عيني ،،، ومافي بنت ممكن تاخذ محل

بريتني سبيرز في قلبي ،،، الا انه لازم نواكب التقوودم

ومن هذا التقوودم ،،، ليه ما اكلم بنات

انا وش يفرق عني وعن بو شنب هذاك اللي كل وجهه تجاعيد وقبل

ما يطلع اشك انه يحط المكوى على خده ،،، ايه وش يفرق عني

وهو بس 24 ساعه يكلم بنات <<< ايه خبرك من النصب يقول انا احلى

من توم كروز

ومن هنا بدات معاناتي ،،، مالقيت بنت تعطيني وجه ،،، حتى اني

حاولت اتلزق في اللي تبيع طراطيع عند فؤاد سنتر ،،، ما دريت الا 5

تكارنه فوق راسي ومعلقيني في المراجيح

ومرت الايام ،،، والشهور ،،، الى ان فقدت الامل نهائيا

وكنت كل ما اشووف بنت قدامي ،،، تجي في بالي صوره بنت عمي

اللي اهلي ملزقيني فيها ،،، واتذكر همسها معي وغمزاتها

وطبعا بنت عمي اذا وصلت لاقصى مراحل رومانسيتها ،،، تجي تمسكني

من اذني وتشدني الى ان توصلني للدرج ،،، وتقولي اذلف لالعن خامسينك

<<< يا عالم ليه الكل يتقوى علي

وفي مره من المرات رحت الفراش بدري ،،، لانه بنت عمي طلقت

انه ما اكل معها في سفره وحده لانه تجيها حاله ضرب هستيريه

وماهي الا دقائق ويرن الجوال

انا : الووو

المتصل : خالد موجوود

طبعا في هذي اللحظه ساد الصمت من ناحيتي ،،، يا لهوتي ،، كاني

اسمع صوت بنت ،،، وانا اللي ارجع واقول ...

الووووو

ايووه ،، خالد موجود

لا والله خالد مو موجود ،، من اقله عشان اخليه يتصل عليكي

(( طبع(ن) لاني فطين فانا ناوي اكلمها على اني خالد بعدين ))

<<< يالدلخ يعني كانها ما عرفت صووتك

المووهم نكمل

قالت

اوكي من معي

وانا اللي اتذكر كلام ابوي لما يقولي ،،، لا يلعبون عليك اولاد الحاره ،،

ولا تاخذ حلاو من احد ،،، واسم امك لا تعلمه ،،، فقلت مدام اسم امي

ما اقوله ،، نسنتج انه اسمي بعد ما اقوله

مشــكلتي مـع اهلي يوم شكــوا اني اكلم بنــت 55001

مشــكلتي مـع اهلي يوم شكــوا اني اكلم بنــت 55001

فصرفت لها اي اسم

قلت

معك بدر

اها ،،، اوكي معك بدور

اوكي اسمي احمد

انا بعد اسمي حمده

اوكي انا خالد اللي تبينه

يا حظي ،، انا بعد اسمي خلوود

الا البنت تشبكني

وانا اللي اتذكر مقوله واحد من الشباب ،،، تبي تشبك البنت ،، خلها تفطس

ضحك ،،، وعلى طوول قلت لها

انا عبسي

طبعا كاتم الضحكه واستناها تقولي ،،(( انا عبسيه ))

شوي ما اسمع الا صووت

طوووط طووووط طووووط

وانا اللي تقفل معي ،، وارووح ركض للحمام ،،، وافرش اسناني

قلت يمكن ريحه فمي ما اعجبتها

وتمر الايام

ويجيني رقم غريب مثل الاول

وانا الي ارد ،، وما اسمع غير هذاك الصووت اللي يرد الرووح

ويخلي القلب بس يقول طربق طربق

برايفت !!!!!

امسك نفسك لا تهز يكفي اخر مرره كبيت الشاهي

المهم

وانا اللي اتذكر المره الاولى لما استخفيت دمي وقفلت في وجهي

وقلت مالها الا ثقل

الوو

هلا ،، ممكن نتعرف

ليه نتعرف ،، وش شايفتني واحد من الشارع<<< اخس يالقوي

لا بس ناخذ ونعطي في الكلام

اقوول اسمعي ،،، انا ماني راعي هالركات ،،، تحسبين ما وراي ظهر

قسم(ن) لاجيب اختي عليكي وربي لتنفت حواجبك

طبعا البنت فاطسه ضحك

وانا اقوول

عسى بعد هالضحكه القبر انشاءالله

وردت

وي ليه انت كذا

وي تويوي في بطنك قولي اميين

والبنت بس تشهق من الضحك

بصراحه

لما شفت البنت تضحك وانا اللي استانس

وارووح ركض لاختي الصغيره واقولها

بسررعه عطيني سبه

وهي اللي تطالع في وجهي وتقول

(( بنك بانثر ))

وانا اللي استانس ولما جيت باسب البنت ،، طالعت في اختي وقلت

لعنبو ابليسك هذي عيارتي

وكالعاده عقابها اعلقها في النجفه

المووهم

البنت قالت

اقوول

قلت

يا عيون اقوول

قالت

يا ملغك

وطووط طوووط

ومن هاللحظه عرفت انه مالي حظ مع البنات ،،، وانه مردي

لبنت عمي

<<< قاعد يتخيل شكله وهو لابس لبس المطبخ ويغسل الصحوون

على طوول بعدها رحت ركض للمطبخ ،، ادور لحضن امي ،،، ابي

احس بالحنان ،،، طبعا انمي على نياتها ،، كل ما تشوفني زعلان ،،، تروح

تسويلي شوربه صينيه