زحمة

[center][center]رُباعيـــــــــــــات
زحمــــــــه

زحمه ف كل مكان ....... زحمه بدون عنوان
الدنيا ليه ضاقِت..............علىَ عالم الإنسان
ــــــــــــــــــ
شايل على ضهري .........باقي سنين عُمري
مخنوق بدون رحمه ... صبري خنق صبري
ــــــــــــــــــ
شوارعنا مليانه............. بحاجات مزحمانا
مش عارفه تتحرك ........... والدنيا كسلانه
ـــــــــــــــــــ
آدي المرور واقف............ وكأنه مش شايف
مذعور مِن الخضه ........... وكأنه فار خايف
ـــــــــــــــــــ
اللوري بيزاحِم ............. طايح مهوش راحِم
لازق على الناصيه ......... وفوقيها راح لاحِم
ـــــــــــــــــــ
أستاذ فريد سارح ............... تايه من امبارح
عايز يروح شـُغلـُه ............بس الزحام جارح
ــــــــــــــــــــ
ماشي معاه همُه ................. اللي حرق دمُه
علشان شوارعنا .................. حالِتها بتغـُمُه
ـــــــــــــــــــــ
دايمًا بيتأخـَّر................. وف شـُغله يتكدَّر
م الفجر متحرك ............. بس النصيب أغبر
ــــــــــــــــــــــ
الميكروباص بالدُور ......... ييجي عليه الدُور
الناس تزقه بعيد ............. يغضب ودمه يفور
ـــــــــــــــــــــــ
يوماتي ع الحال ده ............. حارِن ما يتغدَّا
علشان زحام غادِر ........ خللى الميعاد عدّىَ
ــــــــــــــــــــــــ
الناس بتتشطـَّر...............وف كل يوم تِكتر
فِ الخِلفه يتسابقوا ........مين اللي جاب أكتر
ــــــــــــــــــــــــ
هتروحوا فين تاني ........ دا الأرض بتعاني
ضيقتم الوادي ........ والنيل صرخ ( ياني )
ــــــــــــــــــــــــ
يا ناس يا مخنوقه ........... دي الدنيا مزنوقه
حِلـُّوا عن الوادي ........ واتوَّسَعوا ف روقه
ـــــــــــــــــــــــ
خـُمْس البلاد وادي ......... والحِكمه بتنادي
متوسَعوا شويه ............ إبنوا هناك غادي
ــــــــــــــــــــــــ
جُرتم على التـُربه ....... كانت زمان خِصبه
بتدَمَّروا فيها ................... بوظتم الحِسبه
ـــــــــــــــــــــــــ
الوادي ضاق خالِص ... والشعب مش خالِص
لمَّا البَوَار يـِسْري ........ الخير يروح مَالِص
ــــــــــــــــــــــــ
العِيش بقى في الدِرَىَ .... والحظ للي اشترى
و الدعم لمَّا عجَز .........مسكين لـَبَد في الدُرَه
ـــــــــــــــــــــــ
يوم لما عدِّينا ................. رجعِت لِنا سينا
قـُلنا حنِبنيها ....................؟. لاكِن تـَخلـِّينا
ــــــــــــــــــــــ
والأرض في تـُشكي .... كانت زمان تِشكي
ودِّيت لها المَيَّه ............... وقعدتْ انا أبكي
ـــــــــــــــــــــــــ
ومَصانِع الثوره ............. كانِت أمان بُكره
بـِعناها بالوَكسه .......... مفضِلش غير أُكره
ــــــــــــــــــــــــ
وفلوس بنوك تِهرب ........ مع ناس بتِدَّرَب
ع النصب والسِرقه ........... إدونا كام مقلب
ـــــــــــــــــــــــ
شوفوا كمان مالـُه ........ اللي اشترى بمالـُه
أسهـُم يوَظفها ............ قام انقـَلب حالـُـــــه
ـــــــــــــــــــــــ
واللي فـَتح مَصنع ...........بإديه وقام يصنع
شـَغـَل شباب ياما ........ جاله قانون يضلِع
ــــــــــــــــــــــ
الزحمه ف الإنسان ... ومهيش ف أي مكان
بالعقل نِحسب لها ..........نقدر نفضـِّي مكان
ــــــــــــــــــــــ
لاكِن جمود فِكرنا ............ هُوَّ سبب قهرنا
لو كان حيفضل كِده ..... على بلوى حيجُرِّنا
ـــــــــــــــــــــــ
لو ينكِشف سِرِّنا ............ يغزو العدو بحرنا
ياكـُل ف مال النبي ......... ويذِل ناس كـَفـْرنا

*************